Atol sa virtual press conference sa Land Transportation Franchising and Regulatory Board (LTFRB) 11 kagahapon sa hapon, gibutyag ni direktor Nonito Llanos nga nagpasibaw na sa ilang request ang grupo sa mga taxi operators ug drivers sa rehiyon labot sa umento sa pasahe.
Apan sumala pa ni Llanos,gahulat na lamang ang grupo sa mga taxi operators sa ilang counterpart sa National Capital Region, ang Philippine National Taxi Operators Association nga maoy moduso sa petisyon alang sa usbaw sa pasahe.
Sugod karong adlawa, Hulyo uno, miepekto ang onse pesos nga minimum fare sa unang upat ka kilometros dinhi sa Rehiyon alang sa tradisyunal nga mga PUJs ug trese pesos alang sa modernong PUJs.
Sumala pa ni Llanos, igo na lang kuno nga mosunod ang mga taxi operators sa rehiyon kung unsa ang petisyon sa kauluhan.
Gikumpirma sa opisyal nga duna nay asosasyon sa mga taxi drivers ug operators sa kauluhan ang miduso ug petisyon apan nagdumili una si Llanos nga ibutyag kung pila ang isaka sa pliti sa taxi.
Hinoon giklaro niini nga bugtong gipangayo sa mga taxi operators ug drivers ang additional flagdown rate. Sa kasamtangan, P40 ang flagdown rate sa mga taxi sa Davao City.
“Ilang petition is just to request additional flagdown rate . Wala na poy per kilometer nga increase. Flagdown rate ra pod. Mohulat na lang gyud mi sa proper petition nga ilang i-file sa office if how much,” dugang ni Llanos.
Samtang giangkon sa opisyal nga duna daghang mga taxi ang wala na gadagan sukad pa sa kasagsagan sa pandemya sa niaging tuig.
“Actually tinuod na dili lang tungod sa fuel hike but it all started during sa pandemic. Plus, nadugangan pa sa sigeg taas sa presyo sa petrolyo. There are a lot of operators who filed for storage their units because of lack of passengers during the pandemic,” saysay sa regional director sa LTFRB.
Naglaum si Llanos nga i-reactivate sa mga operators ang naka-storage nga mga taxi human nga dunay singko mil ka mga drivers ang nahatagan sa ayuda sa LTFRB.
Dugang ni Llanos nga usa sab sa ilang nakita nga problema ang kakulang na sa mga taxi drivers sanglit sagad kanila nisulod na sa mga online food delivery service sama sa Grab ug Food Panda.
Facebook Conversations