Gitunol sa Regional Competitiveness Committee (RCC) ug Department of Trade and Industry (DTI) ang 1st Overall Most Competitive Province Award sa tuig 2021 sa Davao del Norte, atol sa gipahigayon nga virtual 5th Regional Competitiveness Awarding Ceremony niadtong Pebrero 22.
Gikan sa tuig 2017, sunod-sunod nga nakuha sa probinsya ang pinakataas nga award tungod sa pinakalabaw nga grado niini sa aspeto sa dinamikong ekonomiya, episiyenteng panggobyerno, imprastraktura ug kalig-on.
Ang padayong pagdaghan sa pamuhunan ug kalig-on sa ekonomiya niini taliwala sa pandemya ang nahimong basehan aron makuha sa probinsya ang pinakataas nga score sa Cities and Municipalities Competitiveness Index 2021 sa rehiyon.
Sa tuig 2021, kapin sa P1.55 billion ang mga investments nga gibubo sa sobra 7,707 ka mga bag-ong negosyo sa lalawigan.
Ang Davao del Norte, mao usab ang nahimong overall 2nd most competitive province sa tibuok nasod sa tuig 2021.
Gidalit ni Governor Edwin Jubahib sa katawhan sa Davao del Norte ang kalampusan sa probinsya ilawom sa iyang liderato. Giila usab niini ang dakong kontribusyon sa mga local government units (LGUs), sa private sector, ug sa tanang mga stakeholders.
Mapasalamaton ang gobernador sa gipakitang dakong kumpiyansa sa mga tigpamuhunan sa probinsya, diin mitala na og P3.6-billion ang mga preskong investments, nga gitampo sa dul-an 17,000 ka mga bag-ong business registrants gikan sa iyang paglingkod sa Hulyo 2019.
Tuig 2019, nadawat usab sa probinsya ang pasidungog isip Most Business-Friendly (MBF) Province sa tibuok nasod ug nagpabilin kini nga Top 10 MBF finalist sa tuig 2020 ug 2021.
Ang Tagum City, ang nakakuha sa 1st Overall Most Competitive Component City Award, ug ang Panabo City, maoy 2nd Overall Most Competitive Component City Award.
Hulagway: DavNor
Facebook Conversations