Barangay Kapitan sa Parang, Maguindanao alegasyong sakop sa sindikato, nakuhaan ug ubay-ubayng baril

Ruth Palo

Editor

posted on 3 years ago — updated on 1 second ago

1,044
views

Ubay-ubayng tag-as nga kalibre sa pusil ug bala ang narekober sa mga sakop sa Criminal Investigation and Detection Group (CIDG) sa usa ka barangay kapitan sa operasyon Biyernes (Hulyo 1) sa Orandang, Parang, Maguindanao.

Subay sa tahu ni CIDG Director Police Major General Eliseo DC Cruz kang PNP Officer In Charge Police Lt. Gen. Vicente Danao Jr., giila ang suspek nga si Usop Sanggakala Aron, 53-anyos.

Ang dinakpan, maoy incumbent barangay captain sa Brgy. Ruminimbang, Barira, Maguindanao.

Gidakop ang suspek human gisilbi ang search warrant ug nakuha gikan sa iyang posesyon ang unom ka M16 rifle nga dunay M203 Grenade Launcher; usa ka M14 rifle; caliber 380 pistol; 16 ka buok nga 40 mm grenade; mga magazines; ug kapin usa ka libong mga bala.

Sumala pa ni Cruz, ang suspek miyembro sa Tating Sarip Crime Group nga nalambigit sa gun-for-hire, gun-running, ug extortion activities sa Parang ug Barira, Maguindanao.

Ang suspek ug mga nasakmit nga armas gidala sa CIDG Regional Field Unit- Bangsamoro Autonomous Region (RFU-BAR) alang sa dokumentasyon ug pagpasaka ug kaso.