Pangulong Duterte, andam na muhawa sa Malakanyang sa sunod bulan; pipila ka gamit, gipauli na sa Davao

Sa Talk to the People sa Punong Ehekutibo kagabii (Pebrero 7), gibutyag niini nga plano na niya mubiya sa palasyo sa sunod bulan ug gani ingon pa sa Pangulo duna na siyay mga gamit nga gipauli na sa Davao.

Ingon sa Pangulo, muadto na lang kini sa iyang opisina on a day to day basis tungod sa trabaho apan di na kuno siya matulog sa Malakanyang.

Iya na lang matod pa gihulat ang adlaw nga siya mukanaug sa katungdanan, maatubang ang mamahimong pangulo, ug mapasa ang bag-ong liderato sa nasod sa iyang successor.

Nagplano usab kini nga mupalit ug gamay ug baratuhon lang nga condo unit sa National Capital Region (NCR)  aron duna kini kapuy-an sa Metro Manila labi pa nga wala usab kini balay dinhi.