Ang decommissioning process kabahin sa “peace agreement” tali sa gobyerno ug mga separatist rebels.
Gimanduan ni Senador Jinggoy Estrada, nga mao ang nangulo sa pagdungog sa senado si Presidential Peace Adviser Carlito Galvez Jr. atol sa pagdungog di pa dugay, nga mosumite ug report labot sa progreso sa deactivation sa armed wing sa MILF nga mao ang Bangsamoro Islamic Armed Forces (BIAF).
Sa bahin ni senador Imee Marcos, giingon niini nga sukad gilagdaan sa gobyerno ug MILF ang comprehensive agreement sa Bangsamoro niadtong 2014, nga niresulta sa kamugnaan sa Bangsamoro Autonomous Region in Muslim Mindanao (BARMM) sa 2019, muabot lamang 12,000 gikan sa 40,000 BIAF fighters ang dili aktibo.
Kahinumduman nga ang decommissioning sa BIAF gisugdan human sa kamugnaan sa Bangsamoro Transition Authority, kinsa mao ang temporary governing body sa BARMM nga sagad gidumala sa kanhi opisyal sa MILF.
Apan, namatikdan sa senadora nga sa 26,132 former BIAF fighters nisurender, mukabat lamang sa 4,625 kinatibuk-ang armas gisurender nga mudawat ug P100,000 cash assistance isip socio-economic package bugti sa pagsurender sa ilang pusil nga gisaad sa gobyerno.
Apan sa gihimong pagduki-duki sa mga senador, gibutyag ni Estrada nga P50,000 lamang ang nakuha sa mga nagsurrender nga MILF fighters samtang ang P50,000 naadto sa ilang mga kumander.
Buot ni Estrada nga sayron ang kamatuoran sa giingong anomalya.
Gawas niini, namatikdan sab sa magbabalaod nga pipila sa mga nagsurender nga tigulang, di na kuno katuhuan nga mga “combatants.”
Sa bahin sab ni Senador Raffy Tulfo, dunay anomalya sa gidaghanon sa armas nga gisurender sa mga MILF rebels nga kabahin sa decommissioning procedure nga gihimo sa Office of the Presidential Adviser on Peace, Reconciliation, and Unity.
Samtang sa pakighinabi kang Engineer Mohajirin Ali, head of secretary of MILF peace agreement ning bag—o lang, gibutyag niini nga nagpadayon matod pa ang validation sa isyu sa decommissioning process.
Giawhag niini si kinsa man ang nagreklamo bahin sa anomalya sa bayad sa MILF rebels nga mugawas aron maklaro ang maong claim ug mahatagan kini ug katin-awan.
Nakatakda sab daw nga mupagawas ug official statement ang BIAF labot sa implementasyon sa decommissioning process.
Facebook Conversations