Subay sa blotter sa kapulisan sa Maa Police Station, giila ang biktima nga si Anabelle Cosido Elizagaque, residente sa Block 5, Lot 5, Espino Subdivision, Barangay Dumoy ning syudad.
Nahibaw-an basi sa imbestigasyon sa kapulisan nga ang biktima kanhiay nalambigit sa investment scheme isip ahente sa RIGEN ug giingong partner sa negosyo sa mga nagpasiugda niini nga sila Rico Garcia ug Paul Auditor.
Nasayran nga tulo ka mga suspek sakay sa motorsiklo nga way plate number ang mipaarak ug pusil sa biktima samtang gamaneho kini sa iyang SUV.
Pagawas ang biktima sa compound sa Power Asia Integrated Sales and Allied Services nga gipanag-iyahan sa iyang anak-babaye sa maong lugar sa dihang gibanat-banatan ug bala sa duha sa tulo ka mga suspetsado.
Nakahiagom ug ubay-ubay nga samad-pinusilan si Elizagaque nga nakaingon sa iyang kamatayon.
Narekober sa kapulisan sa crime scene ang tulo ka deformed slugs, lima ka fired cartridge cases gikan sa kalibre 45 nga pistola, ug personal nga gamit sa biktima.
Padayon pang gi-establisar sa Maa Police station sa pagpanguna ni Major Ma. Teresita Gaspan ang motibo sa krimen lakip na ang pag-ila ug pagsikop sa mga suspetsado.
Hulagway gikan kang Marvin Pineda
Facebook Conversations