Patay na nga nakita ang 48-anyos nga nanag-iya ug beauty salon kinsa giingong nalumos atol sa pagkaligo niini sa Coaco Beach, Brgy. Pampanga, Davao City, adlawng Miyerkules, Setyembre 6.
Giila ang biktima nga si Mario Dalumpines Termoso, lumulopyo sa 291, Carnacion Street, Buhangin, Davao City.
Nasayran sa imbestigasyon sa Sasa Police Station, kauban ni Termoso sa pagkaligo sa dagat ang higala niining si Elbert Bustamante alas 6 Miyerkules sa buntag apan alas 4 sa hapon sa dihang wala na makita ang biktima.
Alas 7 na sa gabii sa dihang nakaplagan sa mga residente sa lugar ang naglutaw-lutaw nga lawas sa biktima.
Walay nakitang foul play ang mga otoridad sa kamatayon ni Termoso.
Gihaya na sa lokal nga punerarya ang patayng lawas niini.
Kahinumduman nga duha sab ka mga batan-on nga taga-Bago Aplaya, Davao City ang nangalumos-patay s a Mergrande Beach Resort niadtong Dominggo, Setyembre 3.
Hulagway gikan sa Sasa PNP
Facebook Conversations