GenSan police nga namusil sud sa bus, usa patay, 2 angol sikop

Sa maong insidente, patay ang usa ka pasahero nga security guard nga si Reynaldo Bigno Jr., molopyo sa Makilala, North Cotabato samtang angol sab ang duha ka pulis nga sila Captain Kent Maurith Pamaos, Patrolman Russel Love Tapia kinsa on duty  sa Magsaysay, Davao del Sur checkpoint/border control point.

Giila ang nadakpang pulis nga suspek sa pagpamusil mao si Corporal Alfred Dawatan Sabas, giingong nadestino sa Police Station 7 sa General Santos City.

Basi sa imbestigasyon samtang galawig ang bus sa Barangay Batasan, Makilala alas 2:30 sa  buntag, kalit namusil si Sabas diin igo sa ulo ang security guard nga pasahero.

Si Sabas mismo ang nagmando sa driver sa bus nga mohunong sa checkpoint nga gidumala sa 1104th Regional Mobile Force Battalion 11 sa New Opon, Magsaysay, Davao del Sur.

Apan, unsang pagkaunsaa nga sa paghunong sa bus, gipamusil na nuon ni Sabas sng duha ka pulis nga duty sa checkpoint.

Human sa pagpamusil, daling nisibat si Sabas apan dakpan gihapon atol sa gilusad nga hot pursuit operation.

Nasayran nga hubog ang suspek nga pulis sa dihang nahitabo ang insidente. Kauban pa  sa suspek ang iyang asawa nga gabiyahe ug posible kuno nga gaaway ang magtiayon hinungdan sa pag-amok niini sud sa bus.