Ang maong lakang gipasar atol sa regular session sa Davao City Council niadtong Martes, Oktubre 13, 2026, pinaagi sa sponsorship ni Councilor Atty. Diosdado Angelo R. Mahipus Jr., isip pag-ila sa importante nga papel sa mga health worker ug nutrition scholar sa paghatag og serbisyo sa panglawas ug nutrisyon sa mga barangay.
Ubos sa ordinansa, ang mga kwalipikadong BHW ug BNS nga adunay kontrata sa City Government of Davao makadawat og tinuig nga financial assistance nga gibanabana tali sa ₱5,000 ug ₱7,000, dugang sa ilang regular nga binulan nga honorarium.
Apan ang Local Finance Committee na ang responsable sa pag-assess ug pagsugyot sa angay nga pondo alang sa maong programa.
Matud ni Mahipus, ang ordinansa dili lamang nagtumong sa paghatag og dugang pinansyal nga suporta, kondili nagpakita usab sa pagpasalamat sa siyudad sa dedikasyon ug sakripisyo sa mga BHW ug BNS nga direktang nagserbisyo sa mga komunidad.
Una nang nakapasar sa second reading ang proposal niadtong Oktubre 6, sa wala pa kini giaprobahan sa katapusang pagbasa.
Human sa pagkompleto sa proseso sa City Council, ipadala ang ordinansa sa Office of the City Mayor alang sa sunod nga aksyon subay sa balaod.
Gipasalamatan ni Mahipus ang mga BHW ug BNS sa way puas nga serbisyo sa katawhan.