Gikumpirma ni Brigadier General Frederick Sales, commander sa 1101st Infantry Brigade, ang pagkamatay ni Corporal Elmer Lagmay samtang gitambalan sud sa military hospital sa headquarters sa Western Mindanao Command (WestMinCom) sa Zamboanga City.
BuyMaps
Lakip sa mga sundalo nga nasamdan mao sila si Sergeant Edgardo Gayao, Staff Sergeant Noel Backas, Private First Class Ismael Degamo, Private First Class Felipe Tañamor Jr., ug Staff Sergeant Dwight Eissen Villamil. Wala pa mailhi ang usa pa ka sundalo nga naangol sa maong insidente.
Sumala sa inisyal nga report, ang mga sundalo sa 45th Infantry Battalion sa Philippine Army nagbiyahe sakay sa usa ka military truck dihang gipusil sila sa mga armadong lalaki nga nag-atang sa daplin sa highway sa Barangay Sabong.
Naapil usab sa pagpamusil ang sibilyang si Daniel Hajim Onton ug ang iyang anak nga si Erpan, 10 anyos nga Grade 4 pupil, kinsa nagsunod sa mga sundalo sakay sa multicab.
Tulo sa mga sundalo ang gipa-airlift sakay sa Air Force helicopter ngadto sa Zamboanga City alang sa medikasyon. Apan, wala maluwas si Lagmay human siya maigo sa bala sa ulo.
Ang ubang nasamdan nga mga sundalo ug ang mag-amang Onton gidala ngadto sa Lamitan District Hospital.
Ang insidente nahitabo pipila lang ka adlaw human sa laing ambush sa Barangay Badja, Tipo-Tipo, Basilan, diin 13 ka sundalo ug mga miyembro sa CAFGU ang nasamdan.
Gisusi sa mga awtoridad ang posibleng kalambigitan sa grupong gipangulohan ni “Saddam Siddick,” usa ka wanted lider sa criminal gang nga giingong adunay kanhi koneksyon sa Abu Sayyaf Group.