Sumala pa ni NBI Officer-In-Charge (OIC) Director Eric B. Distor, November 2021 nakadawat ug letter of authority gikan sa BIR-Dipolog ang wala ginganlan complainant tungod sa P4.5 million nga wala pa mabayring buwis.
Disyembre sa miaging tuig, dunay nadawat nga tawag ang complainant gikan sa empleyado sa BIR Dipolog City, nga nangayo ug P400,000 isip bayad sa wala nabayring buwis.
Gidugang ni Distor nga gihulga matod ang complainant nga ipasaka ang kaso sa Regional Office in Zamboanga City kung di kini motuman ug muhatag sa gipangayo ug obligado kini nga mubayad sa P4.5 million.
Niadtong ikatulong semana sa Disyembre, 2021, niadto sa opisina sa BIR ang complainant kon diin iyang naila-ila ang duha ka BIR examiner nga si Renan Hechanova ug Benjie Sumalpong.
Nihangyo matod pa ang biktima sa duha ka BIR examiner nga hatagan kini ug panahon nga makatigom ug P400,000 nga giuyunan usab sa mga suspek.
Tungod niini, gilayong gikasa sa NBI ang entrapment operation sulod aa opisina sa BIR ug dinhi nadakpan sa akto ang suspek nga si Hechanova samtang gunit ang gipangayong salapu gikan sa complainant.
Si Hechanova, nag-atubang sa patung-patong nga kasong pagsupak sa anti graft and corrupt practices act, extortion ug code of conduct.