Subay sa tahu sa CIDG Angeles City Field unit (CFU) nga nakaabot sa Camp Crame, gipang-ila ang mga nangadakpang pulis nga sila Major
Ferdinand Mendoza, Staff Sergeant Mark Anthony Reyes Iral, Staff Sergeant Sanny Ric S Alicante, Corporal Richmond P Francia, Corporal John Gervic N Fajardo, Corporal Kenneth Rheiner Ferrer Delfin,
Patrolman Leandro Veloso Mangale, ug Patrolman Hermogines A Rosario Jr. , pulos mga miyembro sa Anti-organized crime unit sa PNP CIDG.
Nadakpan ang mga pasaway nga pulis kauban ang duha ka mga Chinese ug usa ka Pilipinong suspek sa dihang mirespondd ang CIDG-CFU sa report nga “robbery in progress” sa usa ka balay sa Missael St., Diamond Subd., Brgy. Balibago, Angeles City.
Naluwas usab sa mga mirespondeng pulis ang pito ka mga chinese nationals ug usa ka Pilipinong kasambahay sulod sa balay.
Unang nagpaila ang mga suspek nga miyembro sa CIDG nga naglusad ug buy-bust operation sa ilegal nga armas sa lugar, apan sa pagsuta, nasayran nga dili diay lehitimo ang operasyon.
Subay sa pasiunang imbestigasyon, gikawat matod pa sa mga suspek ang mga importanteng gamit sulod sa balay sa pito ka Chinese nationals kalakip na ang tseke ug cash nga P300,000 ug US dollar bills.
Sa pagkakaron, anaa sa CIDG Angeles CFU ang mga nadakpang suspek samtang gihikay na ang pagpasaka ug kasong kriminal ug administratibo batok sa mga dinakpang pulis.
Hulagway: PNP-CIDG