30 PA KA PAMILYA SA ARROYO COMPOUND SA MATINA CROSSING, NAHATAGAN UG RELOCATION, AYUDA
Lain pang 30 ka pamilya nga kanhiay nagpuyo sa Arroyo Compound, Matina Crossing, Davao City ang nahatagan ug relocation site sa pamilyang Lui.
Ang 30 ka pamilya mao ang ulahing nahatagan ug higayon sa pamilyang Lui nga magpa-relocate sa Luna nga gipalit sa pamilyang Lui nga gitagana isip relocation site sa mga pamilya nga apektado sa demolition sa Arroyo Compound, Guadalupe, ug Green Valley sa Matina Crossing.
Miyerkules sa buntag sa dihang gidawat sa mga settlers ang affidavit of undertaking ingon man P20, 000 cash assistance.
Nakasulat sa affidavit of undertaking nga walay si bisan kinsa ang makapahawa kanila sa relocation site: Tacunan, Talomo River Calinan, ug Dacudao Calinan.
Niadtong Biyernes, Marso 28 gihimo ang pag-demolish sa nabiling balay sa Arroyo Compound. Hinoon, dunay mga residente ang boluntaryo sab nga nangguba sa ilang balay.
Tuig 1997 pa napalit sa pamilyang Lui ang kapin 24 ektarya nga luna sa Matina Crossing.
Sa kasamtangan, kapin 1,500 pamilya na ang nagpuyo sa tulo ka relocation sites.
Tuig 2019 pa nagsugod na ang pamilyang Lui sa pag-negotiate sa mga settlers sa Arroyo Compound.