Hagit sa NORDECO sa mga magbabalaod nga mahimong patas sa gihimong pagdungog sa balaudnon nga maghatag pagtugot sa pribadong sektor nga makapalapad sa ilang prangkisa hangtod sa pribinsya sa Davao del Norte.
Kini human paspas nga giaprubahan ang house bill 09978 nga nag-amienda sa prangkisa sa Davao Light and Power Company (DLPC) nga magpalapad pa sa ilang coverage area ubos sa Republic Act 8960.
Sa maong balaudnon, gitinguha sa DLPC nga ilang makuha ang pagtugot sa kamara de representantes nga makuha ang unom ka munisipyo sa Davao del Norte, ug duha ka syudad niini, lakip na ang usa ka munisipyo sa probinsya sa Davao de Oro.
Atol sa press conference sa NORDECO Miyerkoles sa hapon (Disyembre 1), matod pa sa legal counsel sa NORDECO Attorney Daniel Campoamor kinsa mitambong sa nahitabong legislative franchise committee hearing sa ubos bay balauranan sa kongreso niadtong Lunes (Nobyembre 29), gidali-dali matod pa sa mga kongresistang miyembro sa komitiba ang pag-apruba sa maong balaudnon bisan pa man sa kawalay nasumite nga position papers ang Department of Energy (DOE), National Electrification Administration (NEA), ug Energy Regulatory Commission (ERC).
Matod ni Campoamor, tataw nga dunay paglapas sa due process requirement ang pagkapasar niini sa committee level.
“Ako lang masulti sa committee level, sa akong pagtan aw ang kaugmaon sa 230,000 member consumer owners (MCOs) sa kooperatiba dili lang nato mahusgahan sulod sa 45 minutos. Akong masulti nga dunay paglapas sa due process requirement,” dugang sa abogado.
Nibarug nga author sa balaudnon mao si Ako Bicol partylist representative Alfredo Garbin Jr. ug co-author si Congressman Pantaleon Alvarez sa Davao del Norte.
“Atuang gipadayag nga ang pagkuha sa 6 munisipyo ug 2 ka syudad dako kaayo ug epekto, unang-una sa mga MCOs sa maong mga lugar tungod kay walay kasiguruhan nga ang susamang power rate sa Davao City mao poy masinati sa maong mga lugar,” dugang pahayag ni Campoamor.
Rason matod pa ni Campoamor, “ Ang consumer density nato matag kilometro sa linya is 24 consumers lang sa isa ka kilometro nga linya samtang sa Davao City, ang usa ka kilometrahe nga linya adunay 112 ka mga konsumante.
Dugang sa opisyal, “atong gibuhatan ug simulation, so ang mabilin nga munisipyo, sa napulo ka munisipyo sa davao de oro makahiagom ug Php 17.27 pesos matag kilowatt nga umento gikan sa Php 6.36 pesos nga matag kilowatt kung kuhaon na ang unom ka munisipyo ug duha ka syudad sa gikan sa NORDECO.”
“Sa kamara nasinati nako tungod kay kulang man tag numero kay wala tay representante nga mubarug kanato, napildi kita didto. Tungod sa kadaghan sa ilang numero wala na gipaminaw ang mga concern agencies sa gobyerno nga gipangutana sa committee hearing kung unsay posisyon sa NEA. Nisulti ang representante sa NEA nga dili sila ready kay magsumite pa sila ug position paper sa ilang baruganan,” dugang asoy ni Campoamor.
“Gipangutana pod ang representante sa ERC mahitungod sa rate impact. Matod pa sa ERC atol sa hearing dili sila ready kay mag come up pa sila ug position paper. Ang DOE, wala pod naka come up ug position paper.”
Gidugang sa legal counsel sa NORDECO, wala usab mahatagi ug higayon ang mga opisyal sa Davao de Oro, labina tong napulo ka lungsod , wala narepresentahan ug madungog atol sa committee hearing.
“Gani ang representante sa MCOs nga mao unta ang dunay katungod nga mohukom sa registration sa electric cooperative, wa usab kini kasulod sa zoom meeting. So diha pa lang nga pamaagi nahikawan kita sa pagpadayag kung unsa gyud ang sentimento sa MCO sa kinatibuk-ang prangkisa sa NORDECO,” dugang paghulagway ni Campoamor.
Naglaum ang opisyal sa NORDECO nga kung ugaling maabot na kini sa senado nga iyang gihulagway nga maoy mature institution sa duha ka lehislatura nga modesisyon pinaagi sa extensive ug lawom nga pag-analisa sa sitwasyon ilabina sa mahimong epekto unya sa rural electrification program sa gobyerno.
Sa kasamtangan, duna pay 635 ka mga sitios sa unom ka munisipyo nga gilangkuban sa Talaingod, Asuncion, Kapalong, San Isidro, New Corella, ug duha ka syudad nga mao ang Tagum ug Island Garden City of Samal sa Davao del Norte, ug ang Maco sa Davao de Oro ang wala pa kini masugai.
Apan matod pa ni Campoamor sa higayong mahatag na kini sa pribadong sektor, ang pondo sa gobyerno alang sa sitio electrification program dili na magamit pa.
“As admitted by Davao Light dili sila makasungkit ug kuwarta gikan sa panudlanan sa gobyerno para sa maong katuyuan.
“Ug sila mugamit sa ilang kaugalingong kuwarta apan kini subject sa recovery, ipatong nila sa bill whereas kung ang NORDECO magpasuga dili na iapil sa bill sa koryente,” pagpasabot sa opisyal.
Padayong gibarugan sa NORDECO nga duna silay igo ug bastanteng supply sa koryente alang sa ilang franchise area, sukwahi sa mga alegasyon.
Gani ang NORDECO dunay kinatibuk-ang contracted power supply nga 112.50 megawatts nga sobra-sobra pa sa gikinahanglang 104 megawatt nga peak demand requirement.
Giklaro sa electric cooperative nga walay bisan usa ka applicant-consumer nga gibalibaran sa NORDECO tungod sa kulang nga supply sa koryente.
Gani, sumala pa ni Campoamor, sa nakalabayng lima ka tuig, ang industrial o high voltage accounts sa NORDECO mitaas sa 1,302 ngadto na sa 3,203 nga tataw nga indikasyon nga ang mga investors nagasulod sa franchise coverage sa electric cooperative.
Base sa rekord, dunay 94,755 bonafide MCOs ang NORDECO nga miperma ug usa ka manifesto nga hugot misupak batok sa unsa mang lakang nga ibaligya ug ibalhin gikan sa DANECO, Inc. ngadto sa pribadong kompanya sama sa DLPC ang electric distribution sa Davao del Norte ug Davao de Oro.