Subay sa tala sa Maa Police Station, giila ang drayber nga si Mark Anthony Cabillon Nacario, 30 anyos, driver sa Krizia Taxi.
Mismong si Nacario mitahu sa kuwerpo sa kapulisan nga siya kuno biktima sa pagpanulis sa duha ka mga wa mailhing suspek. Matod sa iyang saysay atubangan sa mga pulis nga samtang gamaneho kini, duna kuno siyay pasahero nga nagpahatod sa Barangay Magtuod, Maa, apan gipalihis sa mga suspek kuno ang ilang destinasyon paingon sa Barangay Carmen, apan kalit matod pa mideklara ug tulis ang iyang mga pasahero nga armado sa kutsilyo.
Alegasyong gikuha kuno sa mga suspek ang iyang kita nga kantidad sa P3,700.
Tungod sa gikaasoyng insidente, paspas nga naglusad ug operasyon ang kapulisan sa Maa sa pagpangulo ni Major Maria Teresita Gaspan aron masikop ang mga suspek.
Apan tungod posibleng nakonsensya ang drayber, nitug-an kini sa tinuod atol sa gihimong pagduki-duki kaniya nga ang iyang naunang testimonya butbut ra diay.
Gihimo ra kuno niyang alibi ang tulis, human siya naparot sa sugal butang nga pakyas kini sa pag-remit sa iyang obligasyon kompanya.
Tungod sa pagkabakakon ni Mr. Driver, kasong unjust vexation ug paglapas sa Article 183, Paragraph 2 sa Revised Penal Code ang atubangong kaso niini.
Matod sa kapulisan, magsilbing leksyon kini sa mga indibidwal nga magpataka ug tahu nga makaapekto sa seguridad sa komunidad.
Nanganti ang mga pulis nga di nila i-tolerate ang susamang panghitabo.
Hulagway gikan sa Maa Police Station