Atol sa AFP-PNP Press Corps briefing niining Miyerkules (Agosto 10), sumala pa ni Montenegro partikular nga paniguruhon sa ilang ahensya ang “road worthiness” sa usa ka public utility vehicles apil na dinhi ang mga buses ug vans labina karon nga gilauman ang pagdagsa sa pasahero tungod sa Kadayawan.
Gawas sa Kadayawan, kabahin usab kini sa pagpangandam sa LTO sa umaabot nga pagsugod sa klase karong bulana.
Partikular nga nakatutok ang ilang operasyon sa Davao City Overland Transport Terminal (DCOTT), van terminal sa Gmall, terminal sa NCCC-Victoria Plaza, Venus Transport Van Terminal, ug Buhangin Citygate Terminal.
“Karon gina-intensify namo ang terminal inspections kay kana nga panahon mudaghan ang mga tao mugawas ug Davao ug muabot ug Davao aron muapil sa Kadayawan. Before pa lang sa Kadayawan nagasugod nami ug inspection sa mga terminals ug road worthiness sa atoang mga public utility vehicles (PUV). Na timing pud na karon mag-abri na ang klase naisa namo ang among progama sa road safety measures Oplan Balik Eskwela at the same time mao na pud na ang among programa sa preparation sa Kadayawan,” dugang saysay ni Montenegro.
Buot sa sutaon sa mga LTO enforcers atol sa inspecksyon ang sakyanan, lisensya, ug registration sa operators, ingon man road sign inspection sa mga taxis ug jeepneys kung kini ba roadworthy.
“The standard protocols in terms of the road worthiness of a vehicle, while flagging down a vehicle gina- check namo first ang signaling light, suga sa sakyanan, importante pud ang mga ligid hilis na ba kaayo ug dapat pa ba padaganon sa dalan, mao na ang gina-check nato ug kung buak na ba ilang windshield, side mirror ug any other makita na nagsupak sa balaod na RA 4136 ginapara gyud nato,” matod pa ni Montenegro.
Ang mga sakyanan nga mapamatud-ang dunay mga kalapasan ug padayon nga nagdagan, ila kini nga isyuhan Ug Temporary Operator’s Permit (TOP).
Samtang padayon usab nga gihinluan sa LTO uban ang City Transport and Traffic Management Office (CTTMO) ang mga kadalanan batok sa mga trailer trucks nga gipasagdan nga nakaparada sa dalan.
“Amo kini gina-impound gidala sa ilang impounding facility, naa tay due process ginasunod. Kini man gud nga mga trailers nga gibiyaan sa dalan kinahanglan gyud kuhaon kay dili na siya ma-alarm. Sige na lang mig alarm nahurot na among TOP sigeg alarm. Ang ubang trailer ginatanggal na nila ilang mga chassis no. So dili na siya ma alarm naa lang sa dalan ginapasagdan,ginabiyaan,” ingon pa sa opisyal.
Samtang, gibutyag ni Montenegro nga duha na ka mga kolurom nga vans nga may biyaheng-Davao-Agusan vice versa ang nadakpan sa LTO nga nag-operate nga walay prangkisa nga ilegal ug dili luwas alang sa mga commuters.
“Nag level up na sila. Before naa sila gawas sa terminal mag- atang- atang, karon naga-house to house na, online na sila, mo text na lang ka kung asa ka pick-apon. Kana nagabuhat pod mig strategies kung unsaon sila madakpan. Rampant man gud ni siya sa Region 11,” sumala ni Montenegro.
Deputy Head sa Land Transportation Office (LTO ) 11 Law Enforcement Section, Rey Tzaddi Montenegro