Kini ang unang gibutyag sa hepe sa kapulisan sa rehiyon onse Brigadier General Filmore Escobal sa malampuson ug pinakaunang major breast cancer operation sa usa 46- anyos nga pulis nga gihimo sa ambulatory surgical clinic sa headquarters sa Police Regional Office (PRO) 11 sa Buhangin ning syudad Miyerkoles (Nobyembre 24).
Sumala pa ni Escobal, taga- Surigao del Sur nga miyembro sa Philippine National Police (PNP) Caraga Region ang unang recipient sa nahisgutang clinic nga dunay ranggo nga senior master sergeant nga na-diagnosed nga dunay breast cancer.
Nipailawom sa biopsy ang pasyente ug nakumpirma nga duna kini breast cancer.
Niining bulana lamang nahatagan ug akreditasyon ug lisensya sa pag-operate ang maong pasilidad sa Department of Health (DOH) human nakompleto niini ang tanang gikinahanglang rekisitos ug mga ekipo nga gikinahanglan sa operasyon.
Dunay state of the art operating room ang clinic alang sa ba minor ug major operations nga gidumala sa mga medical specialists sa Camp Sergeant Quintin M. Merecido Hospital (CSQMMH).
Ang nahisgutang proyekto, usa lamamg sa mga inisyatiba ni Escobal sa tinguha nga makabaton ug pasilidad ang kapulisan sa rehiyon nga muasikaso sa mga nag-unang medical needs sa mga personahe niini kalakip na ang ilang mga dependents, mga pulis nga anaa sa silingang rehiyon, ug mga otorisadong indibidwal.
Hulagway: Brig.Gen Filmore Escobal