Tubig sa syudad sa Davao, gipanigurong luwas imnon: DCWD
Nagpabiling luwas imnon ang tubig sa syudad sa Davao.
Kini ang pagpaklaro sa Davao City Water District (DCWD) human sa miigo ang diarrhea outbreak sa 19 ka mga barangay sa Toril District ning syudad.
Sumala pa sa tigpamaba sa DCWD Jovanna Cresta Duhaylungsod atol sa AFP-PNP Press Corps briefing adlawng Miyerkules (Hulyo 20) sa The Royal Mandaya Hotel, pasok pa gihapon sa standards ang kalidad sa tubig sa lungsod.
Apan gikanayon niini nga padayon sila nag-awhag sa publiko nga pabukalan una ang tubig ayha inumon alang sa dugang kaluwasan niini samtang gilusad ang imbestigasyon kung asa naggikan ang infection nga miigo sa 147 katao nga nakasinati ug diarrhea.
Dugang ni Duhaylungsod, way undang ang DCWD nga nagbantay sa kalidad sa tubig lukop syudad human sa outbreak.
Matod niini padayong gibantayan sa ahensiya ang tanang tinubyanan sa tubig sa mga barangay nga apektado sa diarrhea aron masuta ang posibleng pagsulod sa kontaminasyon.
Giklaro ni Duhaylungsod nga negatibo sa unsa mang kontaminasyon ang tubig sa DCWD subay sa migulang resulta sa pagtuon niini human ang naasoyng insidente.
Subay sa imbestigasyon sa ilang engineering team, walay nakitang mga liki ang ilang mga tubo nga posibleng sudlan sa contaminants.
Nakig-alayon ang DCWD sa City Health Office aron sutaon ang uban pang tinubdan sa tubig sa mga barangay sa Toril District ug kasikbit niini sanglit dunay mga source sa tubig nga dili konektado sa DCWD service line.