Atol sa AFP-PNP Press Corps Media Briefing sa The Royal Mandaya Hotel, gibutyag ni Captain Mark Anthony Tito, tigpamaba sa 10th ID nga walay puas ang ilang focus military operations ilabina sa bahin sa Davao de Oro ug Davao Oriental kon dii anaa ang Weakened Guerilla Front (WGF) 18 sa New People’s Army (NPA).
Dugang sa opisyal nga ang WGF 18 nga gipamunuan ni Naravel Berana mao na lang ang nag-inusarang Guerilla Front sa Rehiyon Onse nga padayong gikomprontahe sa kasundaluhan.
Matod pa ni Tito, way hunong ang paggukod sa tropa sa gobyerno sa maong grupo sa NPA. Giklaro hinoon sa opisyal nga dyutay na lang ang milangkob sa WGF 18.
Nanawagan kini sa nahibiling sakop sa Guerilla Front nga musurender alang sa mas malinawong pagbag-o sa kinabuhi.
Gipaniguro ni Tito ang tabang gikan sa gobyerno alang sa mga miampo nga NPA.
Gihataga’g bili ni Tito ang dakong tabang nga nahatag sa programa ni Pangulong Rodrigo Duterte sa pagsumpo sa insurhensya pinaagi sa National Task Force on Ending Local Communism and Armed Conflict (NTF-ELCAC).
Sa maong inisyatibo, nahataga’g solusyon ang mga socio-economic nga problema sa mga residente sa kabukiran.