Sa pakighinabi sa News Fort kang Abellera, giingon niini nga wala sab siya makadawat ug pormal nga kopya sa resolusyon sa HNP ug iya na lang nahibaw-an ang iyang pagkatanggal sa partido pinaagi sa social media.
“Actually hasta ako naglibog ko tungod kay nabasa ko lang sa social media, wala ko nakadawat ug formal copy sa resolution. Wala ko kadawat ana formally. So wala ko kabalo sa tinuod nga rason,” matod pa ni Abellera.
“Mao nay gusto nako mahibal-an. Sa tinuod lang wala ko kabalo sa rason. Bisan sa resolusyon wala may rason nakabutang,” dugang sentimiyento ni Abellera.
Si Abellera, kinsa subling mikandidato pagka-konsehal sa unang distrito sa syudad human sa iyang siyam ka tuig nga nahimong konsehal sa syudad niadtong 2019, ug gihulipan sa iyang amahan Konsehal Nilo Abellera Sr.
“Sukad paghawa nako sa council 2019, wala man ko nag-abusar, naghilom man ko,” dugang ni Abellera.
Sa pangutana kung nakatuman ba kini sa mga patakaran sa HNP, giasoy ni Abellera nga wala siyay mahinumduman nga nisupak siya sa unsa mang polisiya o prinsipyo sa partido.
“Kanus-a man daw ko nisupak sa HNP. Gusto gani nako masayran unsay rason kay pwede man ko motubag. Normal man sa tao nga idepensa iya kaugalingon,” dugang pagpaklaro niini.
“Walay due process. Ing ana akong pagsabot kay kung naay due process unta gipatubag mi, kanang murag korte nga patubagon ang nag-akusa, patubagon ang nagdepensa..so wala mi kabalo unsay rason,” asoy sa kanhi konsehal.
Bisan sa pagtanggal kaniya sa HNP, gipasalig niini nga magpadayon gihapon kini sa pagdagan aron subling alagaran ang iyang mga constituents sa distrito uno.
Wala sab kini planong muambak ug laing partido sanglit suportado matod pa niya ang mga Duterte.
Gawas kang Abellera, gitangtang sab isip miyembro sa HNP si Konsehal Pamela Librado nga sama kang Abellera wa sab makadawat ug kopya sa resolusyon sa withdrawal sa iyang nominasyon.
Sa bahin ni Librado, wala sab kini hatagig higayon nga depensahan ang iyang kaugalingon batok sa mga malisyoso ug walay basehan akusasyon. (BY RUTH PALO)