Gibutyag sa hepe sa Public Safety and Security Command Center Angel Sumagaysay atol sa AFP-PNP Press Corps briefing adlawng Miyerkules (Marso 23), all system’s go na ang operasyon sa Roxas Night Market sugod ugma.
Dugang ni Sumagaysay nga upat ka section mulangkob sa Roxas Night Market nga langkuban sa food, ready to wear (RTW), accessories ug alang sa mga therapist.
One entrance, one exit gihapon ang himoon susama kaniadto sa wala pa nahitabo ang pandemya. Sugdan ang operasyon alas 5 sa hapon hangtod alas 12 sa tungang gabii, matag adlaw.
“Gusto rin namin na from 12 a.m to 1 a.m cleared ang Roxas Night Market so that pagka-ugma business as usual tungod kay may mga establishments sa palibot sa dalang Roxas ug di ta gusto ma-hamper ang mga negosyo,” matod pa ni Sumagaysay.
Gipasidan-an ni Sumagaysay ang mga vendors nga mutamod sa ipatuman nga mga polisiya.
Aminado si Sumagaysay nga nahimo nang inila ug icon sa syudad sa Davao ang Roxas Night Market ilabina sa mga langyaw ug lokal nga turista, kon diin angay usab mga mapatunhay ang kalinaw ug kahinlo sa lugar.
Dugang sa opisyal nga gawas sa PSSCC nga maoy gitahasang mamuno sa operasyon sa Roxas Night Market, anaa usab ang City Transport and Traffic Management Office (CTTMO) nga maoy gitahasan sa traffic flow ug pag-identify kung asa ang mga parking areas; City Environment and Natural Resources Office (CENRO) ang in-charge sa kahinlo sa lugar; ug Civil Security Unit (CSU) maoy gitahasan sa crowd control.
Ang Davao City Police Office ug Task Force Davao alang sa paghatag seguridad ug anti-terrorism efforts.
Ang City Health Office mao usab ang in-charge sa health aspect sa mga vendors lakip na ang kahinlo sa pagkaon.
56 stalls ang food section, RTWs and accessories 65 stalls, therapist 100.
Giklaro ni Sumagaysay nga abri ang Roxas Night Market, bakunado ka man o dili.
Samtang sa pikas bahin, gibutyag ni TF Davao commander Colonel Darren Comia nga magmuntar ug tactical command post ang Task Force sa dalang Roxas aron ilang ma-monitor ug ma-supervise ang day-to-day activity sa Roxas Night Market.
Kapin kon kulang 30 ka mga personahe sa TF Davao, gawas pa sa 126 ka mga pulis ug 30 ka mga CSU personnel nga mulangkob sa security forces sa Roxas Night Market matag adlaw.
Hulagway: City Government